المفتول البيتي

نخلط الطحين الاسمر مع الطحين الابيض (في ناس تفضلو كلو اسمر. بس انا هون بحكي انا شو عملت)

بنحط المي والملح ببخاح ماء (مرش) اسهل بالشغل. في منهم يحطو بجاط ويرشو بايدهم.

وننقع البرغل بماء دافئ لعشر دقائق تقريبا.

هلأ بنبلش شغل. بنرش صدر كبير بشوية طحين بنطول شويه برغل وننثرهم فوق الطحين وبنرجع نرش فوق طحين.

ونبلش نشتغل براحه اليد على الخفيف او بروس الاصابع المهم نعمل شكل دائري بايدنا حتى تتكور الحبات.

وبنضل بالتناوب بين رش المي ورش الطحين ونكور الحبات. والي بيكبرو معنا بنحرك الصدر باتجاهنا وناخد الحبات الكبيره متل هيك.

بنشيلهم ونحطهم بجاط على جنب ونكمل بهذه الطريقه لنخلص شغل.

وما تنسوا تنظفوا الصدر بايدكم كل ما يتجمع العجين عليه لانو بيصير صعب الشغل عليه.

وهيك بنكون خلصنا الكميه، عملوا معي ٢ كيلو مفتول 😍😍 الحمدلله لانو المفتول بركه عشان عجين الحمدلله

هسه ننتقل للتهبيله الاولى (هيك اسمها) بنجيب طنجرة بنحط نصها ماء وورق البصل يلي حنقطعو لطبخ المفتول وملح ومنكهات) بنحط عليها مصفايه. وبنعمل عجينه عويصه حتى نلزق المصفايه بالطنجره وما تطلع البخار برا

وهي العجينة اكيد فهمتوا قصدي هلا من الصورة

هلا بنحط المفتول بالمصفاية ونستنا الماء ليغلى ويبلش يطلع البخار من المفتول. بدو تقريبا ساعه الا ربع ليستوي. ونعرف انو استوا انو جنابو بتفك 👍👍 (انا بغطي المفتول بفوطة نضيفة او بشكير حتى ما ينشف)

بس يستوي بنشيلو ونحطو بصدر ونجيب كاسه ماء بارد. ونبلش نرشرش بالمفتول ونفك الحبات بايدينا (وعشان المفتول كتير سخن. ضلك حطي ايدك بالماء البارد 🙊)

هيك المفتول بكون خلص واذا بدنا نفرزو بنفرزو، او بنكمل طبخو على التهبيله التانيه. ورح اعملها بوصفه تانيه ⁦❤️⁩🌹🌹 طبعا ريحتو ما بقدر اوصفها بتشهي.